samedi 23 mars 2019

De quoi parle-t-on en occitan le mercredi?

De quoi parle-t-on en occitan, les mercredis après-midi au Café "Br'òc branlant de Saint-Estèphe ?
- de rhinocéros laineux et de rhinocéros des prairies..
. parce qu'ils vivaient ici, il y a 100 000 ans !..
l'occitan étant  facile à lire,  je ne traduis pas !!!

L'occitan es parlat tots los dimecres de 5 oras a 6 oras ½ de l'apres miegjorn

au « Br'òc Branlant » noveu Cafè associatiu de Sent Estefe !


« Apres l'estufladis, n'um parla occitan ! » ditz lo programa ! E qu'es entau que de la gent, venguts de Charanta, Nauta-Viena ò Dordonha s'assemblen autorn d'una tabla per discutar de tot ò de ren juste per lo plaser de far viure la linga occitana, dins totas las variantas ! Daus uns parlen plan bien, d'autres l'estudien ò l'an estudiada e chascun pren la paraula sens complexe en tota simplicitat !

Dimecres passat, apres los portaments, Brunò nos parlet daus arqueòlogues venguts d'Engolesme estudiar la cròsa trobada en 2010, jos sa maison a costat de Montberon (Montbron)... una cròsa que pareis plan importanta de beleu 2 quilometres de galarias, ocupada i a 100 000 ans -entre doas periòdas de glaciacion- per de las ienas ! D'apres los arqueòlogues qu'an trobat de las òssas, de las gròssas dents, 'quela cròsa auriá servit de gitre-sala a minjar a 'quelas ienas qu'atacavan doas varietats de rinoceròs que vivian dins lo coenh a l'epòca, los rinoceròs lanos e los rinoceròs de las pradelas ! An trobat tanben daus bocinons de crasnes de lion, bisons, singlars e quitament de las marmòtas ! Qui sap si se trobará pas, a l'avenir, de las gravaduras coma 'quelas de Taijac (Teyjat) ???

Per lo moment, lo Brunò davala pus dins las galarias afen de ren esbolhar mas migra daus resultats de las analisas daus especialistas ! « Tot parier, se'n passet de las chausas dins 'queu ranvers, qu'es pas de creure !!! » Herve, qu'aviá començat de parlar dau project d'installar 5 « vira-au-vent » (éoliennes) dau biais de Sent-Matiu n'aguet pus lo temps de tot explicar... qu'era l'ora de laissar la plaça a n'autra reünion ! Faudrá atendre la setmana que ven per tot saber !

'Queu Cafè es dubert a tots... n'um pòt rentrar, surtir, beure un veire ò pas... fau juste aver envia de parlar ò d'essaiar de parlar en occitan !

Jaumeta Beauzetie- Champs Romain.